കെ.എസ്.ആർ.ടി.സിയിലെ പുതിയ സൗജന്യ യാത്രാ പദ്ധതികൾ സൃഷ്ടിച്ച കടുത്ത സാമ്പത്തിക പ്രതിസന്ധി മറികടക്കാൻ വേറിട്ട വഴികൾ തേടി സംസ്ഥാനത്തെ സ്വകാര്യ ബസ് ജീവനക്കാർ. ടിക്കറ്റ് വിൽപ്പനയ്ക്ക് പുറമെ ബസുകളിൽ പലഹാര കച്ചവടം നടത്തി വരുമാനം കണ്ടെത്താൻ ശ്രമിക്കുന്ന ജീവനക്കാരുടെ ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. പത്തനംതിട്ട സ്വകാര്യ ബസ് സ്റ്റാൻഡിൽ നിന്നുള്ള ഈ വീഡിയോ, സംസ്ഥാനത്തെ സ്വകാര്യ ബസ് വ്യവസായം നേരിടുന്ന രൂക്ഷമായ പ്രതിസന്ധിയുടെ നേർചിത്രമായി മാറുകയാണ്. ബസ് വ്യവസായം നിലനിർത്താൻ ടിക്കറ്റിതര വരുമാനം കണ്ടെത്തണമെന്ന ഗതാഗത മന്ത്രിയുടെ നിർദ്ദേശം അക്ഷരംപ്രതി നടപ്പിലാക്കുകയാണ് ഇവിടുത്തെ ജീവനക്കാർ.
മന്ത്രിയുടെ ‘വൻ ഐഡിയ’യും ബസിലെ പലഹാര കച്ചവടവും
യാത്രക്കാർ തീരെയില്ലാത്ത, ഏറെക്കുറെ കാലിയായ ഒരു സ്വകാര്യ ബസിനുള്ളിൽ ജീവനക്കാരൻ അച്ചപ്പവും മുറുക്കും മിക്സ്ചറും അടങ്ങുന്ന പലഹാരങ്ങൾ വിൽപ്പന നടത്തുന്നതാണ് പത്തനംതിട്ടയിൽ നിന്നുള്ള വീഡിയോയിലുള്ളത്. സാമ്പത്തിക പ്രതിസന്ധിയിലായ സ്വകാര്യ ബസുകൾ ടിക്കറ്റിതര വരുമാനങ്ങളെക്കുറിച്ച് ഗൗരവമായി ആലോചിക്കണമെന്ന് ഗതാഗത മന്ത്രി അടുത്തിടെ വ്യക്തമാക്കിയിരുന്നു. കെ.എസ്.ആർ.ടി.സി ചെയ്യുന്നതുപോലെ ബസുകളിൽ പരസ്യം നൽകിയും, കാർഗോ സംവിധാനങ്ങൾ ഏർപ്പെടുത്തിയും വരുമാനം വർദ്ധിപ്പിക്കാമെന്നായിരുന്നു നിർദ്ദേശം. ഈ ആഹ്വാനം ഏറ്റെടുത്താണ് ജീവനക്കാർ ഇപ്പോൾ ബസിനുള്ളിൽ പലഹാര കച്ചവടം ആരംഭിച്ചിരിക്കുന്നത്. പ്രതിസന്ധി മറികടക്കാനും ഉപജീവനത്തിനുള്ള വരുമാനം കണ്ടെത്താനുമുള്ള ജീവനക്കാരുടെ ഈ ഗതികേട് പൊതുസമൂഹത്തിൽ വലിയ ചർച്ചയായിരിക്കുകയാണ്.
പ്രിയദർശനി യാത്രാ പദ്ധതിയും സ്വകാര്യ ബസുകളുടെ തകർച്ചയും
കെ.എസ്.ആർ.ടി.സിയിൽ ‘പ്രിയദർശിനി’ സ്ത്രീ സൗജന്യ യാത്രാ പദ്ധതി നിലവിൽ വന്നതോടെയാണ് സ്വകാര്യ ബസുകളുടെ കളക്ഷൻ കുത്തനെ ഇടിഞ്ഞത്. ഈ പുതിയ സാഹചര്യം സംസ്ഥാനത്തെ സ്വകാര്യ ബസ് വ്യവസായത്തെ കടുത്ത പ്രതിസന്ധിയിലേക്ക് തള്ളിവിട്ടിരിക്കുകയാണ്. വിഷയം ഗൗരവമുള്ളതാണെന്ന് സർക്കാരും ഗതാഗത വകുപ്പും നിരന്തരം ആവർത്തിക്കുന്നുണ്ടെങ്കിലും, സ്വകാര്യ ബസ് മേഖലയെ സംരക്ഷിക്കാൻ ഉതകുന്ന യാതൊരുവിധ പ്രായോഗിക നടപടികളും ഇതുവരെ കൈക്കൊണ്ടിട്ടില്ല. പ്രതിസന്ധി പരിഹരിക്കാൻ സർക്കാർ തലത്തിൽ ഫലപ്രദമായ ഇടപെടലുകൾ ഉണ്ടാകാത്തത് ഉടമകളെയും ജീവനക്കാരെയും ഒരുപോലെ ദുരിതത്തിലാക്കിയിരിക്കുകയാണ്.
800 ബസുകൾ സർവീസ് നിർത്തി; പണിമുടക്കിലേക്ക് ബസുടമകൾ
നഷ്ടം സഹിച്ച് മുന്നോട്ട് പോകാനാവാത്ത സാഹചര്യത്തിൽ സംസ്ഥാനത്തെ എണ്ണൂറിലേറെ സ്വകാര്യ ബസുകൾ ഇതിനകം ജി-ഫോം (G-Form) നൽകി സർവീസ് നിർത്തിവെച്ചിരിക്കുകയാണ്. പ്രശ്നപരിഹാരത്തിനായി സർക്കാർ അടിയന്തരമായി ഇടപെടാത്ത സാഹചര്യത്തിൽ ശക്തമായ പ്രതിഷേധ പരിപാടികളിലേക്ക് കടക്കാനാണ് ബസുടമകളുടെ തീരുമാനം. ഇതിന്റെ ഭാഗമായി വരുന്ന 20-ാം തീയതി മുതൽ തിരുവനന്തപുരം സെക്രട്ടേറിയറ്റ് പടിക്കൽ ബസുടമകൾ അനിശ്ചിതകാല നിരാഹാര സമരം ആരംഭിക്കും.
സ്വകാര്യ ബസുകൾ കൂട്ടത്തോടെ സർവീസ് നിർത്തുന്നത് സംസ്ഥാനത്തെ ഗ്രാമീണ മേഖലകളിലുൾപ്പെടെയുള്ള യാത്രാ സംവിധാനത്തെ താറുമാറാക്കും. കെ.എസ്.ആർ.ടി.സിക്ക് മാത്രം ഉൾക്കൊള്ളാൻ കഴിയുന്നതിലും വലുതാണ് കേരളത്തിലെ പൊതുഗതാഗത ആവശ്യം. അതിനാൽ, വരും ദിവസങ്ങളിൽ സർക്കാർ ബസുടമകളുമായി ചർച്ച നടത്തി അടിയന്തര സാമ്പത്തിക പാക്കേജുകളോ നികുതി ഇളവുകളോ പ്രഖ്യാപിച്ചില്ലെങ്കിൽ, പൊതുജനങ്ങൾ കടുത്ത യാത്രാക്ലേശം നേരിടേണ്ടി വരും.